Die Vlinderslag Venters

 11.       Eerste verjaarsdag

Hierdie Ventertjies in Carbon Blanc se hartjies was bietjie broos hierdie week. Laas Sondagaand was ‘n moeilike aand vir ons. Die realiteit van ons hoofstuk in Frankryk het naby aan die been gesny. Ons moes saamtrek en hierdie rouproses identifiseer vir wat dit is. Ons moes bietjie deur dit stoei en dan weer ons emosies en ons mission vir die Here gee. Dankie tog vir ons Vader wat ons optel….want self... sukkel ons.

 

Jos het ook Sondag aan sy heel eerste swemgala deelgeneem. Een item was rugslag, ‘n tweede was vryslag en die laaste item was ‘n borslag/ vryslag combo. Hy het vierde in sy een lopie gekom en tweede in die ander twee. Ons het besef daar is reëls in swem ook. Reëls soos; twee hande moet die muur raak voor jy mag omdraai en jy kan ook nie vir ewig onder die water swem nie. Hey….dis hoe ons leer. Jos het ook besef hy is nie die beste swemmer in Frankryk nie al was hy die beste swemmer in sy groepie van drie in Wierda Park, Suid Afrika. Dis waardevolle lesse wat die man leer.

 

Woensdag was sy verjaarsdag en gister was sy partytjie. Lisa het haarself omtrent oortref. Dit was balonne, smulpakkies, cupcakes en ‘n koek….ook in aggenome die beperkte hulpbronne wat sy tot haar beskikking gehad het. Sy moes by Mathieu gaan bak het en met Lemmetjiegroen versiersuiker met crottes de souris (direk vertaal as muispoef....eintlik net sprinkles) en “Caramel treat” (wat Francois met sy vorige trip Frankryk toe vir ons ingesmokkel het), het sy smiles op almal se gesigte gesit. Al die maatjies het vir hom gesing….ons ook. In Engels en in Frans. Ek moet sê…ek het soos ‘n egte Springbokondersteuner op Loftus gevoel wanneer die Bokke die Walliesers pak. Die atmosfeer is elektries. Dis vuurwerke want die Impis het hul verskyning op die veld gemaak, die skare brrruuulll…dis net rook waar jy kyk…en dan draf die Bokke op. Dis chaos!!! Dan is daar een of ander celeb wat gekies is om die volkslied te sing. Ek hhmmm-haaa-sa saam en dan hier erns in die middel… “O se boloke setjhaba sa…SOUTH AFRICAAAA” want ons almal wag mos vir die Afrikaanse deel om in te skop…seker omdat dit al deel is wat ek ken. Dis hoe dit vir my gevoel het toe hulle vir Jos “ Happy Birthday” en “Joyeux Anniversaire” gesing het….ek het net gewag vir die deel wat ek ken...en dit was die Hiep-Hiep-Hoera deel.

 

Frankryk is nie net besig om herfs binne te gaan nie, hulle is ook besig om hul staakseisoen in volle glorie te beleef. Dit is nie veel anders as in Suid Afrika nie. Ons weet mos dat hierdie vakbonde ‘n tydgleuf het waarin alles moet gebeur. Hier het almal mos lekker vakansie gehou in Augustus. Die vakbonde kom dan in September bymekaar en besluit dan waar gaan ons begin moeilik maak en die land op sy kniee dwing….Oktober skop alles af en hulle moet vining tot ‘n slotsom kom want wie hou nou daarvan om in die nat en koue te gaan protesteer. In Suid Afrika wil hulle ook gewoonlik dinge voor kersfees afhandel. Hierdie laaste week in Frankryk was dit die brandstof-raffinaderye wat hande gevou het vir meer geld. Parys en sekere groot sentras was sonder brandstof en dit het die land taamlik in ‘n paniek gejaag. Indien so ‘n staking die ekonomie drasties gaan belemmer, kan die president ‘n force majeure aankondig wat dan die weermag die reg gee om die staking onmmidelik te briek. Ons het darem nie daardie punt bereik nie, maar hierdie week gaan Jos weer by die huis moet kom eet want die kantienwerkers gooi dan ook hul potte, opskeplepels en resepteboeke neer.

 

Ons gaan jul nog vertel van die een-wang, twee-wang, drie groetgedrag wat ons moet aanleer. Ons kry dit nog steeds nie lekker reg nie maar ons leer. Daai ervaring sal ons nog met jul deel maar tot dan……

 

Groetnis/ Salutations

 

Die Vlinderslag Venters