Die (on)Verklaarbare Venters

 

15.   Nog brood?

Hierdie week was besig, maar die dinge waarmee ons onsself besig gehou het, gaan julle nou nie vreeslik amusant vind nie. Dis wel die week na die Les Bleus die Bokke geklop het en ek het elke Franse rugbyliefhebber die reguit-vraag gevra…”Was daai ‘n drie”? Die beste antwoord wat ek gekry het, was van Pierre-Marie….”julle het ons een geskuld”. Die uitdrukking op my gesig het sommer gewys... “hoe bedoel meneer nou?” Hy vat my terug na die 1995 Rugby Wêreldbeker Semi-finaal op ‘n papnat Kings Park waar die Franse nr.5 slot in die doodsnikke van die wedstryd oor die lyn geboender het en die skeidsregter gewys het dat die bal kort was. Hy het ook sommer die eindfluitjie vroeer geblaas as die tyd op die stadionhorlosie. Ek moes weer daai drie gaan soek op Youtube en ek dink die Franse het besef dat daardie drie meer vir Suid-Afrika sou beteken het as vir hulle. Om te dink dat hierdie Fransman vir byna 30 jaar met hierdie work, maar ook hoop, in sy hart rondgeloop het en dat Wayne Barnes hom uit sy verdriet kon red,…maak die berusting by die beslissing die moeite werd. Ten minste is ons nou “quits”. As Rassie net hiervan geweet het kon hy sy tweets aangepas het. Ek het nou nie Rassie se nommer nie, maar ek is seker ek sal dit by Charlize kan kry.

 

Ons het onlangs ook geteken vir ons nuwe tuiste. Ons is in die proses om huis te koop….in Frederic Chopin straat! As als goed gaan, behoort ons teen mid Februarie te kan intrek. Ons is vreeslik opgewonde! Ek en Lisa maak al planne en ons verbeelding speel lekker saam. Een van die dae kan julle almal kom kuier…net nie gelyk nie asseblief. Toe ons die reelings moes maak om by die prokureur te gaan teken is daar aan ons bekend gemaak dat ons ‘n vertaler teenwoordig moet hê, want hulle wil nie die risiko loop dat ons erns in die toekoms kan sê…”Ons het nie verstaan nie”. Nou ja, daar is toe ‘n vertaler aan ons toegeken en toe die dame by die kantore opdaag….praat sy wraggies Afrikaans met ons! UIT DIE VELD GESLAAN! Die vroutjie het groot geword in Suid Afrika (haar ouers is Frans wat steeds in SA bly) maar hier kom studeer. Sy het haar man hier ontmoet en toe hier begin werk. Die vertaalproses was maklik en die koopkontrak, van byna 220 bladsye, het elke moontlike aspek aangespreek. Van die skoorsteen-skoonmaaksertifikaat, tot 'n termietsertifikaat, tot ‘n erkentenis dat die rede hoekom die huidige eienaars verkoop nie as gevolg van raserige bure is nie. Die dokument wys selfs tot hoeveel bakkerye (onder andere) in 'n twee kilometer radius van die huis is.

 

Dit is ‘n interessante statistiek om te dokumenteer…die hoeveelheid bakkerye nogal.  Die broodrevolusie datteer egter baie jare terug. Die onluste wat gelei het tot die val van die Bastille op 14 Julie 1789 en ook die begin van die Franse Revolusie, was as gevolg van die volk se soeke na graan en wapens. Die landbewoners van Parys het geglo dat daar ‘n korrupte opgaardery van graan was en dat dié praktyk gelei het tot ‘n kunsmatige verhoging van graanpryse en sodoende broodpryse. Lang dun brode was al beskikbaar sedert die 1800s maar die spesifieke verwysing na die Franse Baguette het blykbaar eers sy oorsprong gekry toe wetgewing in 1920 ingestel is dat bakkerye nie tussen tienuur die aand en vieruur die oggend mag bak nie. Nou hoe gemaak as jy lekker vars stukkie tradisionele brood teen ontbyt wil hê? Wel, die langer en dunner baguette het die probleem opgelos. Die broodjie mag tussen 50 en 65cm lank wees en moet op die perseel gebak word waar dit verkoop word. Dit bestaan uit vier bestandele (water, gis, meel en sout) wat dit vining maak om voor te berei en te bak. As jy die baguette deursny is daar hier en daar ‘n gat….amper soos Centurion deesdae. Dit is ook ‘n tradisie hier dat jy die punt van die baguette moet afbreek en eet sodra jy by die bakkery of winkel uitstap. So, dis nie snaaks om op ‘n saterdagoggend ‘n dikbek oom met drie witbrode onder die arm in die straat te sien stap nie.

 

Na laassondag se swem, het ons Jos getoets of hy nog in Afrikaans kan spel. Hy het goed begin maar hier en daar het die franse alfabet deurgekom. Ek was beindruk dat hy afrikaanse woorde sommer in frans spel. Lisa roer ook vir Bakkies. Sy help my baie reg. Ek gee nie om om so nou en dan verkeerd te wees nie maar ek kry ‘n gevoel sy geniet dit om my reg te help. Net om jul bietjie blootstelling te gee aan die verwarring wat ons moet front…. Le Fromage beteken kaas en dié woord het ‘n manlike geslag. La Mozzarella is ook ‘n kaas maar het ‘n vroulike geslag. Ek het geen rasionele verduideliking hoekom dit van manlik na vroulik verander nie. Dit bring wel 'n nuwe dimensie aan: “uit die yskas klim”.  

 

Groetnis/ Salutations

 

Die (on)Verklaarbare Venters