Die Feestelike Venters

 33. Wanneer tyd hardloop.

 

Hierdie week was alles behalwe tydsaam en ordinêr. Parys brand, die mense kla, daar is optogte en winkels in die stad word gesluit. Hugo het die Polisie gebel en oral sien jy die blouligte flits. Hierdie is Frankryk waaroor ek skryf, en nie Suid-Afrika nie. Boonop sou Koning Charles ook nog kom kuier het, maar die publiek se stemme was te dik. Hulle wil nie eers op 64 jarige ouderdom aftree nie. Dit moet 62 jaar bly...hulle wil ook darem die lewe geniet terwyl hulle nog jonk genoeg is. Hierdie Franse stokvel-spaarvarkie loop leeg en Macron moet geld erns anders vandaan kry. Miskien uit die einste weermag- of polisiebegroting.

 

Die onnies het nie Vrydag skool toe gekom nie... juis as gevolg van al hierdie drama. Sodoende, het Jos ook Vrydag by die huis gebly. In die Fisika101 klas op Tukkies, jare terug, het ons opgestaan en verdaag as die proffie na vyftien minute nog nie opgedaag het vir klas nie. Later het van die belhamels in die klas geleer dat as jy die groot horlosie in die lesingsaal met 'n uitveër gooi...stap die minute vinniger aan. So het die vyftien minute vinniger verby getik...en dan staan ons op. Ongelukkig het die prof dit ook geweet en tydens eksamentyd het hy weer die horlosie met 'n uitveër gegooi.

 

Vanoggend het die daai einste Fisika die Franse horlosies met een uur laat aanskuif. Ons is nou op dieselfde tyd as SA. Ek kon voel ek het een uur minder slaap in gekry...veral toe ek 'n wedloop vanoggend moes gaan hol. Dit was die " Fête les vins de Sainte-Emilion " of die Fees van die wyne! Ons het 'n span van vier ingeskryf maar op die nippertjie het twee onttrek. Ek en Mathieu was die span op die ou ent en het die 12km deur al die Châteaux en wingerde van Sainte-Emilion aangepak saam met 3000 ander hollers. Dit was koud en winderig en toe die skoot klap toe begin dit nog boonop reën ook. YSKOUD! Sainte-Emilion is bekend vir hul wyne en dan is die pragtige wingerde al teen die hange van die heuwels geplant. Nou ja...heuwels. Ek weet my lyf is eerde gebou vir afdraendes...ek haal hom net uit rat uit en vertrou die brieke werk, maar as dit kom by opdraendes, help my diff-lock nie eers nie. Daar was baie ops en afs...soveel dat die melk in my bene suur geword nog voor ek die eindpunt gehaal het. As prys dat jy die wedloop voltooi het, kry jy nie 'n medalje soos ek gewoond is nie...nee genade...jy kry 'n bottel wyn. Hoe dan anders?

 

My meisie van twintig jaar, het verjaar dié week. Dit was Lisa se eerste verjaarsdag in Frankryk en nou het ons al drie al hier verjaar. Sy het haar sussie ook hier gehad, so dit was ektra spesiaal. Chicken Burgers was op die spyskaart vir al die maatjies wat kom kuier het. Nog het ek besef watse aantrekkingskrag sy het. Die Vader het haar toevertrou met hierdie gawe en Hy gebruik haar elke dag...en sy is gehoorsaam.

 

Hierdie week is ek en Francois weer op reis, so... Lisa en haar sus sal seker die stad rooi verf...figuurlik gesproke natuurlik.

 

Groetnis/ Salutations

 

Die Feestelike Venters