Die Versteekte Venters

 35. Miltsteek

 

Miltsteek…almal van julle het seker al erns in jul lewens te doene gehad met hierdie pynlikheid. Al gewonder waar hierdie steek in die milt vandaan kom? Die oorsaak van hierdie steek is eintlik 'n spasma in die diafragma - dit is die spier wat jou asemhaling beheer. Dis hoekom jy stadiger moet hardloop wanneer jy 'n steek het – dit laat jou stadiger en dieper asemhaal, en dit veroorsaak dat die spasma in die diafragma dan verdwyn. Die spier kan beter rek en ontspan wanneer jy stadiger asemhaal. Daar is ‘n paar faktore wat hierdie steek veroorsaak maar die grootste een is: Onfiksheid!

 

Jos het Vrydag aan sy skool se jaarlikse Landloopresies deelgeneem. Dis eintlik net ‘n een kilometer baan, uitgelê in die parkie (Parc Flavol) en albei Carbon Blanc skole het deelgeneem. Een kilometer is nou nie ‘n marathon nie maar vir ‘n spul onfikse kinders is dit genoeg om somme ‘n klomp milte aan te steek. Nou ja, toe die skoot klap toe is hulle soos ‘n spul bye wat wegtrek en soos hul gôe begin uitval steek daai bye die kinders se milte. Jos is nie gespaar nie. Hy het altemits sesde gekom…ons glo hom…net buite die medaljes blykbaar.

 

Hier is nie goeters soos skoolsport nie. Geleenthede om aan buitemuurse aktiwiteite deel te neem is maar beperk vir die kinders. Hier is nie genoeg grond om atletiekbane, rugbyvelde of hokkievelde te bou vir elke skool nie en indien die kinders aan ‘n sport wil deelneem, is dit uit en uit die ouers wat hierdie proses moet dryf. Klubs is die enigste opsie. In Suid Afrika maak die skole dit makliker vir die kinders om aktief te wees, al is dit net skaak. Buiten Jos se swem, wat hy drie keer ‘n week doen en tennis op Woensdae, ry hy darem fiets skool toe en saam met my elke Saterdag as ek gaan draf. Hardloop en hardloopervaring is nie groot op sy lys nie en daarom het die milt in die slag gebly. Ons gaan sy draffiksheid moet opskerp.

 

Hy is nie die enigste een wat aan hierdie “miltsteek” verskynsel blootgestel was nie. Ek het die afgelope twee weke in die Engelsprekende Oos-Afrika gereis. Twee weke weg van die Franse. Twee weke van geen Franse taalklasse. Ek het ook steek in die milt ervaar op Parys lughawe toe die immigrasie offisier my ‘n paar vrae in Frans begin vra het. Dis asof die pyn suutjies inkruip en jou herhinner aan wat skort is. Ek gaan my taalfiksheid weer moet opskerp.     

 

Lisa se bakbelangstelling het taamlik toegeneem. Seker maar omdat Mathieu dinge so maklik laat lyk. Hierdie naweek het sy hamburger bolletjies, ‘n volgraanbroodjie en onderandere “hot cross buns” gebak. Dis Paasnaweek en hierdie is mos ‘n gebruik wat ons ken. Hot cross buns is nie ‘n Franse gewoonte nie. Hulle ken dit nie… die Engelse het dit uitgedink. Die broodjie merk die einde van die Lydenstyd en verskillende dele van die “Hot cross bun” het 'n sekere betekenis. Die kruis is ’n voorstelling van Jesus se kruisiging en die speserye binne dui op die speserye wat gebruik is om Hom by Sy begrafnis te balsem. Dis nie net Jesus se dood en waarvoor Hy gesterf het nie maar die feit dat Hy opgestaan het, wat ons geloof definieer. Hy het gesterf sodat ons kan lewe. Mag julle almal ‘n geseende Paasfees beleef.

 

Groetnis/ Salutations

 

Die Versteekte Venters