Die Verwaaide Venters

 36. Die Franse-Kaapse-Dokter

 

Die weer regoor Frankryk kan in April 'n bietjie wisselvallig wees—die idee van April-buie is baie werklik hier!  Jy kan 'n mengsel van sonnige en reënerige dae verwag, met 'n gemiddeld van 10 reëndae versprei deur die maand.  Neerslaghoeveelhede kan wissel na gelang van waar jy besoek: Parys ontvang net minder as 'n duim reën in April, terwyl hier langs die Atlantiese kus, ons gemiddeld 2 duim kan ontvang. April bring ook 'n winderigheid saam met hom...net soos Augustus daar in Suid-Afrika. As ek die weer in April moet beskryf is dit soos 'n ou oom wat die dokter gaan besoek vir 'n jaarlikse check-up . "Trek maar uit oom...laat ons kyk" sê die dokter. Soos die oom kreun om sy skoene los te maak glip daar 'n paar winde verby. "Oops , jammer dokter...ek weet nou nie waar daai lawaai vandaan gekom het nie" sê die oom. "Op my ouderdom vertrou ons mos nie meer 'n poep nie...jy gaan of nuwe klere moet aantrek of jou serp hoër moet skuif." "Hoe gaan dit met die prostaat oom?" vra die jonge dokter...hy sal mos nie weet nie wat ons oues moet trotseer nie. "Die prostaat neuk maar soos 'n man ouer raak dokkie." Hier sukkel die weer ook met die gedoente...dit reën bietjies bietjies...en sodra jy seker is dit het klaar gerëen en die son skyn...dan sien jy jou broek is weer nat. Waar de ongeluk het dit vandaan gekom? Waar is my jas? Hoekom loop my neus eweskielik? Hier moet jy maar vir al die seisoene voorberei elke dag.

 

Jos het vakansie vir twee weke (nog een week oor) en ons het 'n paar projekte vir hom uit gedink wat hom sal besig hou. Een projek was om 'n bo-aansig skets van ons erf te teken met elke boom en struik op. Dan moet hy elke plant gaan identifiseer. Ek is nie Keith Kirsten nie maar ek hou van 'n mooi tuin...Lisa ook. Ek snoei baie goed...en Lisa plant baie graag...maar as dit by aan-die-lewe-hou kom...struik(el) ons. Hopelik sal Jos inkoop in die groen-idee en ook eienaarskap neem. Hy het laas naweek gras gesny...hy het wel nog 'n paar kunslesse van hoe om 'n simmetriese grasperk te skep, nodig. Hierdie week gaan hy een bedding ('n ou groentetuin) se onkruid moet uitspit...ons is opgewonde om te sien waarmee hy vorendag kom en watse planne hy gaan beraam.

 

Groetnis/ Salutations

 

Die Verwaaide Venters